Shqiperia ne luftrat Ballkanike

Po mbushet një vit prej ditëve në të cilat drithërimat e para të luftës përshkuan gadishullin ballkanik. Mbi brigjet e Adriatikut, deti më i kontestuar se çdo kufi tokësor, kërcëllisnin gjatë verës së shkuar krismat e përflakura të kryengritësve. Dukej se për shkak të një përsëritjeje të veçantë ndodhish, lufta donte të riniste të shkruante historinë e saj prej këtu, prej ujërave që në vjeshtën e vitit 1911 kishin parë siluruesit italianë në ndjekje të anijeve të perandorisë osmane. Se cili ka qenë qëndrimi i popujve ballkanikë gjatë vitit të madh të krizës së tyre, do të thuhet në këto faqe. Titulli, i vënë në krye të vëllimit, mund të ngjajë madhor, por është, në të vërtetë, modest: popujt ballkanikë janë vëzhguar këtu vetëm në vitin e luftës, domethënë jo në një periudhë të gjatë të jetës së tyre normale - me atë urtësi dhe përthellim shqyrtimi që pikërisht një periudhë amullie e frytshme do të kërkonte por gjatë zhvillimit të krizës së tyre - shkruan autori në krye të librit të tij duke dhënë edhe konceptin që përshkon të gjithë veprën e tij.